【Now財經台】茶飲股奈雪的茶(02150)股價今日急升，主要係公司今日正式推出合夥人計劃，即特許經營權加盟店商業模式，集團解釋，目的係畀更多消費者可以更方便地體驗奈雪嘅產品及服務，加快市場拓展及品牌覆蓋，雖然奈雪股價今日升至50天線水平，但企唔穩，股價要再上係咪阻力重重？
耀才證券研究部總監植耀輝指，奈雪股價近期走勢唔好，近幾個月都要向下，加上近期市況好差，整個內需消費板塊都表現唔好，不過，由於股價比較殘，所以傳出利好消息時，反彈亦係合理，不過，奈雪有唔少蟹貨，所以當股價大升時，升到高位就會出現沽壓亦係合理，股價要再有突破，就好視乎今次特許經營模式成唔成功。
