【Now財經台】醫療設備股諾輝健康(06606)發盈喜，雖然未有預測中期能否扭虧為盈，但公司預期收入、毛利按年勁升逾2倍至3倍。集團解釋，中期收入及毛利大升主要係旗下3款居家檢測癌症產品賺到錢，而3款產品嘅毛利率最高逾90%，上半年擴大銷售之餘，仍可進一步推高毛利。
華盛證券經紀部董事李偉傑認為，內地疫情退卻後，民眾比以前更關心身體健康，更願意做篩查，依家中期收入最高已逾8億人仔，相信有機會突破17億人仔嘅全年銷售收入指引。隨著公司有更多產品商業化，並繼續提升現有產品嘅市場滲透率，屆時盈利基礎將會更牢固，佢又估計，諾輝健康盈利將顯著增長。
Jason續指，諾輝健康股價由上周五(7日)低位約26元，升至今日高位32.55元，短短3日已累升25%，難免會有獲利盤湧現，導致股價好快就倒跌。佢又話，可能有資金開始喺28元以下水平重新入貨，預期股價上落區間會推高至介乎28元至32元，投資者可考慮趁低吸納。
