【Now財經台】有無人駕駛概念嘅浙江世寶(01057)AH股今日異動，A股漲停板，H股則勁升20%以上，今朝輕微高開後，曾短暫倒跌，之後走勢轉好，午後顯著抽高，並愈升愈多，成交金額大增至近3億元，成交股數較過去100日同時段平均大增13倍。
浙江世寶喺剛過去嘅星期日發通告，去年10月建議定向增發A股，集資最多逾11億人仔擴產能，新增年產60萬套智能轉向系統，股價喺定向增發公布詳細時間表及作價前持續有炒作。
睇返日線圖，浙江世寶續受制於上周三創出嘅逾5年高位，即3.23元水平，投資者須提防股價近日被炒高，係高位配股誘因帶動，浙江世寶股價連續兩年喺5月、6月異動，投資者必須小心。
