【Now財經台】照明燈飾股雷士國際(02222)今朝公布，擬向公司執董及副總裁王頓配售股份，集資淨額約6970萬元，配售價每股83仙，較上周五收市價71仙有近17%溢價，但對比資產淨值(NAV)就大幅折讓90%。
配股後，原來冇持股嘅王頓將擠走原大股東德豪潤達，以約16.7%持股一躍成為最大股東。《香港股票財技密碼》作者梁杰文認為，公司高層溢價注資通常被解讀為管理層對公司前景有信心，但佢覺得呢次配股嘅目的冇咁單純。
Mike分析指，雷士高層可能有意攤薄德豪潤達嘅權益，因為公司手頭現金充裕，冇逼切集資需要，而一般公司想籌集資金時，通常會做小規模供股，甚少以特別授權配股，因為要拖好耐，直至股東特別大會通過先成事。
Mike估計，配股好大機會獲通過，不妨考慮下現時趁低小注吸納，博股份借配股通過嘅消息反彈。
