【Now財經台】農業銀行(01288)下周一除淨，股價今日裂口低開近2%後，跌幅擴大，一度低見2.84元，跌近3%，跌至3月以來低位，並連跌第4日，雖然股息率高，但都撐唔起股價，今日更失守支持線，即2.9元水平。
近日內銀成為焦點，因為爆出高盛疑唱淡內銀風波，雖然外資大行唱淡個別板塊唔係新鮮事，但就觸動咗市場神經，搞到高盛要急急澄清，話唔係唱淡或要渲染悲觀情緒，而官媒《證券時報》今日刊出頭版評論文章，話基於悲觀假設，睇淡內銀股基本面存在誤讀，雖然農行14天RSI跌到約32嘅超賣水平，但股價仍繼續尋底，似乎反映市場都係先沽為敬。
