【Now財經台】高盛指，地方政府債務可能影響內銀股息率，全線下調息率預測，由普遍8厘或以上降至4至7厘，又預期交通銀行(03328)今年未必達到派息目標，工商銀行(01398)、農業銀行(01288)喺2025年亦可能出現同樣情況。
南華金融集團高級分析師莫灝楠認同高盛報告，預期內銀股多年嘅派息增長或斷纜，又話依家想買收息股，應該避開同內房相關嘅板塊，例如內銀及水泥股，而公用股派息會更穩定。
Casper續指，今年初「中國特色估值體系」沾邊嘅國資企業都被炒上，推高咗內銀股估值，股息率望落就唔夠秤，加上股價多年原地踏步，作為收息股回報唔吸引，仲話買中國移動(00941)好過，因為做到6厘息。
佢又建議，揸住內銀股嘅投資者喺除淨前沽貨，因為除淨日開始前股價會自動扣去股息，到時先沽就有機會「賺息蝕價」。
