【Now財經台】智欣集團(02187)股價連續兩日急瀉，今朝輕微低開後，隨即插水，午後再跌穿上晝低位，一度低見2.83元，暴瀉逾58%，成交股數較過去100日同時段平均大增9倍。
智欣今年5月喺冇特別消息下，不斷破頂，市值一度炒上76億元，而喺6月港股10大升幅榜中亦排第8位，集團本業同內房相關，去年純利大跌94%，但市盈率(PE)炒到3000倍。
智欣股價喺冇基本因素配合下連番被炒起，近日股價「跳水」，暫時兩日累跌逾80%，今日低位較歷史高位10.2元，大跌72%，智欣本身街貨較少，自由流通股份僅佔已發行股數約23%，雖然股價暴跌，但今年以來仍累升16%。
