【Now財經台】國家醫保局就《談判藥品續約規則》及《非獨家藥品競價規則》公開徵求意見。綜合內媒分析，兩套規則將令藥品談判嘅價格降幅更加合理及溫和，利好創新藥定價。
生物科技及製藥股於午後全線異動，其中，榮昌生物(09995)升得最勁，股價今朝平開後，一度跌2%，但中午收市前開始倒升，午後買盤湧入，股價更曾飆升22%，高見41.7元後繼續喺日內高位徘徊。
榮昌生物今年6月正式「甩B」，主要研發自身免疫及抗腫瘤產品，目前收入來自「泰它西普」同「維迪西妥單抗」呢兩款已商業化嘅藥品。呢兩隻藥已進入國家醫保目錄，帶動集團去年產品銷售收益大升4.6倍，但由於研發開支龐大，公司去年要盈轉虧，今年首季虧損擴大至逾3億元人民幣。
技術上，利好消息帶動榮昌股價今日營造雙底，升穿埋約38元嘅頸線，如果收市企得穩，計量度升幅可以上望約46元水平。
