【Now財經台】花旗下半年選股名單出現唔少行業代表，包括上半年表現最好嘅藍籌之一網易(09999)、周大褔(01929)、金沙中國(01928)、比亞迪股份(01211)、申洲國際(02313)、友邦保險(01299)、華潤燃氣(01193)。
其他大行又點睇呢？東亞銀行財富管理處投資策略師陳偉聰表示，下半年睇好服務式消費相關板塊，尤其旅遊消費股將受惠於暑假及「十．一」黃金周出遊需求嘅高增長。
此外，Jason認為，電力及新能源板塊會受惠原材料同部件成本下降，而推升下游嘅發電公司回報率，而內地減息亦有助負債普遍高企嘅電力股降低融資成本。佢續指「中國特色估值」概念股，例如基建、國企內房、內銀、電訊板塊，都值得留意。
Jason又話，短期可留意7月底中央政治局會議前有冇更多刺激經濟政策出台，或會帶動港股反彈，不過下半年仲有美國加息等不明朗因素，佢預期港股難出現大牛市。
