【now.com財經】上個星期下半場真係悶到發霉，唔緊要，整體6月綜合【輪證贏家】同【輪證下半Part】成功出到倉嘅計算，喺未扣除因交易而產生嘅費用下仍然錄得正數，咁樣嘅市有咁樣嘅成績，已經算是不錯。
今朝起身睇新聞話耶倫婆婆會喺星期四至星期日(7月6日至9日)訪華，同中國高層官員會談，傾咩？唔知，不過膊頭幾粒花嘅會面，市場可能會揣測中美關係有望好番啲，恒指今朝早升86點，開市重上19,000點樓上，到依家開咗市只係五分鐘，指數已經飆升逾200點，現報19,128點。再嚟到9點44分，恒指升幅已經擴大至升逾300點，最高見過19242點，同小時圖嘅保歷加通道頂線19,251點，只係爭9點。作戰室頭圍好倉全部錄得正數，正數到仲可以直接收工添。
準備到10點時，指數高開高走後，依家稍稍向下回落，第一層熊證19,100至19,199點全數掰，呢層只係有相當於61張期指街貨。不過，高衝過後係有啲代價，就係指數要向下稍回後，再衡量返邊一邊有力，然後再重新度過第二注點出。
依家10點5分，可能喺小時圖保歷加通道唔放行，喺保持橫行情況下，指數高位掂到保歷加通道頂線後就向下回落，目前恒指升幅略為收窄至升175點，報19,092點，喺五分鐘圖上見整條保歷加通道由今朝通道口拓闊變成依家整條呈上，指數同Slow STC(14,3)出現觸頂向下，行Swing唔係問題，問題在於指數會用邊兩條線夾住自己嚟行Swing，頂線至底線行得最闊，但如果今日指數係有心再向上殺街貨的話，用頂線至中軸亦都係可以。
恒指牛(68070)，收回價18,800點，同現價約有400點差距，進取嘅先留意指數喺五分鐘圖上落到保歷加中軸有支持就偷位出動，借中軸至頂線行Swing；如果中軸失守的話，唔緊要，仲有底線，或者等返Slow STC(14,3)落到超賣位然後出場，當平時咁行一趟Swing又得啫。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
