【Now財經台】東亞銀行(00023)獲大行富瑞唱好基本面，股價一度升9%，並升穿11元，收市升幅收窄至6%，報10.8元。不過，紅蟻資本投資總監李澤銘認為，股價急升更多係因為市場又開始憧憬集團私有化。
最近新世界發展(00017)、太古(00019)等大企業陸續開始資產重組，甚或私有化。而東亞自舊年8月向友邦保險(01299)出售藍十字保險嘅股權後，再冇相關消息。
Alan分析指，東亞已經冇乜核心資產可以賣，而傳咗十幾年嘅私有化亦好難成事，因為股權結構分散，主要股東分別持股約10至20幾%，李國寶及家族成員更只佔約6%。
Alan建議吼返大型銀行股，例如滙豐控股(00005)、恒生銀行(00011)、中銀香港(02388)等，並指加息環境下存款利息成本相當高，有利存款基礎較大嘅大型銀行。
