【Now財經台】醫療器械股微創機器人(02252)今朝輕微高開後，升幅曾擴大至17%，高見24.6元。
公司噚晚公布，自主研發嘅蜻蜓三維電子腹腔內窺鏡，順利通過英國標準協會(BSI)審核，成功獲得歐盟合格認證(CE)，係集團第二款獲歐盟認證嘅產品。
消息大大加強企業形象及市場對產品嘅信心，刺激股價今日大升，公司仲係未有錢賺嘅B仔股，市場可能期望呢項產品為公司逐步帶來盈利貢獻。
微創機器人股價呢兩日都係大成交向上，今日更衝破50天線，但暫時受制於100天線，即25元水平，現價距離招股價43.2元仍有水位，留意股價係咪有力突破25元阻力位。
