【now.com財經】噚日揀咗隻恒指熊(67696)，原先計畫等指數確認向下穿過小時圖10線之後就出動，不過等咗一個上半場都未見佢向下穿，反而仲被指數踩住上，唯有變陣試等五分鐘圖Slow STC(14,3)上返超買再出當行一趟Swing。終於，喺噚日3點鐘見五分鐘圖Slow STC(14,3)兩線上到80以上嘅超買位水平，(67696)發出咗可以落場嘅訊號，不過，呢個鐘數出動的話，要有過夜準備，所以注碼上同Day Trade嘅有所唔同(自己衡量下啦)。
按噚日3點起見Slow STC(14,3)兩線超買至3點15分後見回，喺呢15分內出隻(67696)嘅話，以期內高低位做過0.042元/0.04元，即平均買入價為0.041元。
去到完場時，指數稍稍向下，而Slow STC(14,3)兩線亦回落至中軸水平，兩線保持向下都還安心少少。
不過，今日係月結+季結+半年結日，按照傳統指數都會喺呢啲期結日前做返好少少，再加上戰友提醒大家臨近回歸，中港股市造好亦係「正常」，所以今朝恒指開市微升8點時都咪話唔怯一怯。但到正式開市後，第一粒燭「大陰燭」向下殺到五分鐘保歷加底線後，第二粒燭回穩但唔過中軸，第三粒燭想同佢做「平底」但最後失敗，於是喺作戰室玩即日Trade嘅就膽大心細地開出第一注小注淡倉；過夜淡倉嘅就繼續。
嚟到依家10點10分，指數似乎都無乜理會到今日係咩日子，恒指升轉跌向下跌193點，報18,978點，暫時最低見過18,952點，跌逾210點，而五分鐘圖嘅Slow STC(14,3)兩線仍然處於超賣水平，行緊超賣再超賣架啦，換言之隻過夜(67696)幾時走都真係隨便你。
貪心鬼想再Hold落去的話，依家小時圖見失守中軸其實係有條件變佛系嘅，不過，都Alert一下五分鐘圖Slow STC(14,3)可能同指數一齊出觸底，事關開始見到保歷加頂線向下，用五分鐘圖10線作為量度線係可以嘅；唔過線咪等到小時圖保歷加底線囉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
