【Now財經台】完美醫療(01830)股價今朝輕微高開後，上晝大部分時間窄幅上落，中午出咗業績後，升幅即時擴大，衝上逾1個月高位，收市報3.76元，升逾4%。
完美醫療業務遍及內地、香港、澳門及新加坡，集團全年收入及純利按年齊升約3%，扭轉中期業績錄雙位數跌幅嘅劣勢，拆開上下半年睇，下半年收入及純利比上半年升8%至9%，反映去年底內地放棄清零政策，同埋本港3月取消口罩令，成功帶動集團醫療美容業務反彈。
業績亦提及，通關後客戶消費力仍然強勁，去年客戶醫療美容平均消費增7%至28000元，集團又宣布，今個財年大舉擴張本港業務，將會增設10家分店，似乎對後市非常樂觀，但要慎防一下子擴張得太快，成本開支大增，反而令利潤率受壓。
