【Now財經台】線上醫療股藥師幫(09885)今日首掛，高開後一度掃高16%，高見23.3元，其後走勢轉弱，收市僅較招股價高5%，報21.1元。
博威環球證券金融首席分析師聶振邦指，公司招股安排支持股價今日造好，唔似近期大部分新股上市首日就「潛水」，佢解釋，今次招股規模佔總發行股數約6.32億股，僅約2.5%，而配售部分佔約1581萬股嘅招股規模近90%。
聶Sir指出，計及其他投資者，大戶持貨相當於街貨規模逾84%，屬貨源高度歸邊，如果大戶冇大舉沽貨，股價就可以靠穩，同今日首掛表現吻合。
聶Sir建議，想短炒嘅投資者可小注買入試水溫，如果今個星期埋單可以喺今日高位23.3元收市，預期股價未來1個月有機會上試25至25.5元，反之，股價應該會喺上市價20元至22元間徘徊。
