【Now財經台】美蘭空港(00357)股價今日創3年新低，今朝高開2%後，跌幅好快擴大至近7%，低見9.87元，午後喺10元樓下徘徊，跌約6%。
公司最新通告指，海南美蘭機場獲批增加航班升降數量，端午節國內旅遊出行數據又超越2019年水平，但呢兩個好消息都幫唔到股價。
市場憂慮海南島2025年實施全島商品免關稅，會對島上現有免稅店營運商經營帶來好大衝撃，同業中國中免(01880)股價上周五(23日)亦創上市新低。
另一方面，下半年會進行第2階段審理纏繞集團多年，遭索償58億元嘅相關仲裁，令股價前景更不明朗。
美蘭股價已連開10支陰燭，但14天相對強弱指數(RSI)已跌穿20嘅極超賣水平，短線可能出現技術反彈，但要突破27元水平嘅阻力區難度好高。
