【Now財經台】景福集團(00280)股價今朝高開14%後，升幅一度擴大至逾30%，高見0.47元，升勢亦有成交配合，暫時成交金額逾310萬元，成交股數亦較過去100日同時段激增約80倍。
集團上周五收市後派咗舊年嘅成績表，全年多賺32%，收入按年升近10%，金條買賣收入按年升30%，不過，股價今日勁升主要同派息有關，除咗派末期息2仙，仲派特別股息8仙，即合共派10仙，以發行股數近9.1億股計，今次派息涉資約9千萬元，仲高過每股盈利嘅8.73仙。
景福股價今日喺大成交下抽升，突破前年拉出嘅下降趨勢線，隨著市道逐步復甦，生意有機愈做愈有，但未來亦要留意經營成本趨勢。
