【Now財經台】維他奶(00345)今日跌逾17%，低見10.1元。中信里昂最新報告指，集團去年度下半年表現差，雖然本港銷售仍有增長，但內地銷售跌20%，表現差過預期。
紅蟻資本投資總監李澤銘認同中信里昂嘅觀點，指集團下半財年盈轉虧，而內地業務嘅增長前景不如以前明朗，認為單靠香港業務難以維持集團之前嘅估值同派息。
Alan續指，內地飲品市場競爭激烈，即使改變銷售策略或增加宣傳開支，都未必有理想嘅回報；至於澳洲及新西蘭業務，人口基數低加上要同當地乳業競爭，佢認為對盈利增長幫助有限。
佢認為，維他奶股價同營運需要較長時間先恢復到疫情前水平，關鍵係內地經濟幾時真正復甦。
Alan又話，維他奶一向有唔少長線投資者同基金持貨，如果佢地決定沽貨，未必單日可以反映曬，沽壓會持續一段時間，加上估值唔算平，佢認為唔需要喺現價出手撈貨。
