【Now財經台】由多家華爾街金融機構合組而成嘅虛擬資產交易平台EDX正式上線，刺激加密貨幣價格反彈，其中，比特幣(Bitcoin)價格一度重上29000美元，唔少概念股都借勢炒上，包括創業板股份捷利交易寶(08017)。
股價今日高開後，隨著Bitcoin衝上即市高位，升幅亦跟隨擴大，最多升逾18%，創新高，收市升近16%，報2.49元，全日成交金額逾7000萬元，成交股數較過去100日同時段平均大增12倍。
公司沾上Bitcoin概念係因為上周一收市後，話公司旗下嘅行情交易軟件國際版TradeMart，發布咗加密貨幣行情，即係實時買賣盤報價，但做唔到交易。睇返公司業績及網頁，其實都唔太理解公司嘅賺錢模式，投資者都唔適宜見股價炒高就追貨。
