【Now財經台】細價股天安(00028)、中國醫療網絡(00383)及聯合集團(373)原本今朝復牌，但開市前齊齊再出通告話繼續停牌，等根據公布收購合併守則發布內幕消息，復唔到牌會惹嚟咩揣測？ 中國醫療網絡之前宣布計劃供股，而供股會導致天安喺中國醫療網絡持股增加，連同一致行動人士持股，須提出全購，中國醫療網絡嘅小股東應該點回應？
《香港股票財技密碼》作者梁杰文估計，復唔到牌可能係通告有甩漏，例如文字問題，可能監管當局要求作出澄清，公司先可以正式復牌，暫時只能靜觀其變，但公司都停咗咁耐牌，之前供股都係買賣兩閒，即使依家多咗個要約，但估計復牌都唔會因為咁大升大跌。
Mike又話，中國醫療網絡股價相當集中，加上唔少小股東都喺高位買貨，帳面都輸唔少，加上估計冇乜小股東會接受全購價，遲啲公司復牌，或遲啲天安完成全購，可能最終都唔會有股東接納要約，股權架構都唔會有大分別。
