【Now財經台】中國燃氣(00384)股價今朝平開後，一度倒升近1%，但其後再度向下，股價曾低見9.21元，跌1.7%，跌勢亦有成交配合，暫時成交金額約1200萬元。
集團上周五收市後宣布，分拆旗下部分增值服務業務嘅建議獲聯交所批准，將會喺主板獨立上市。不過，內地房地產銷售唔理想，影響公司嘅燃氣接駁及天然氣銷售，以至廚房用品相關嘅銷售都受拖累，加上市況欠佳，喺呢個時候分拆上市，招股反應及市值都係未知之數。
中燃將會喺下周一(26日)派全年成績表，不過，中期盈利已按年倒退20%，整體盈利都好難有明顯改善。中燃股價連日畀保歷加通中軸壓住，後市要留意出業績時，會唔會就分拆業務有進一步解說。
