【Now財經台】智欣集團控股(02187)暫時連升第3日，股價今朝平開後，一度升3%，高見9.43元，成交量較過去100日同時段平均增逾兩倍。
集團上月宣布同永定自然資源局簽訂投資合同後，股價升勢加劇，過去1個月累升逾70%，除憧憬業務擴張，內房投資環境亦好轉，加上集團計劃喺福建省投資建設石英礦深加工及輕質環保建材生產項目，總投資約11億人仔。
睇返技術走勢，智欣幾條主要移動平均線呈多頭排列嘅強勢形態，14天RSI一直喺70以上嘅超買水平，雖然暫時好難估頂，但依家市盈率(PE)逾4000倍，相信較難支撐現價，而福建投資項目涉及金額巨大，可留意下周五(23日)前，公司交代幾時開特別股東大會，以及建議採用邊種形式集資，有貨要小心股價隨時借消息回調。
