【Now財經台】球王美斯今晚會帶領阿根廷隊，喺北京體育館同澳洲隊踢友誼賽，有份做Adidas服裝代工嘅申洲國際(02313)，股價今日大升，一度迫近80元關口，收市報79.65元，大升逾11%，成交股數較過去100日同時段增逾倍。
申洲主要客戶包括Nike、Adidas及Uniqlo，噚晚Nike股價錄得今年最大升幅，公司指，歐洲業務帶動集團6月銷售反彈。高盛最新發表嘅內地體育服飾行業報告提及，2021年發生嘅新疆棉事件，對外國體育品牌嘅影響開始消退，申洲主要客戶正正係歐美大品牌，所以申洲都可以間接受惠。
不過，大華繼顯噚日警告，申洲3大品牌客戶去庫存最少持續至第3季，而集團定單能見度仍然低迷，業務最快第4季才真正轉勢，後市要留意走勢會唔會持續轉強。
