【Now財經台】內地面對通縮壓力，5月內地居民消費價格指數(CPI)按年僅升0.2%，工業生產者出廠價格指數(PPI)就錄得7年以來最大跌幅，反映內地消費及上游生產需求仍然疲弱。
冠域商業及經濟研究中心主任關焯照指，內地已經減咗人仔存款息，又計劃年底前推汽車促銷優惠谷消費，但始終解決唔到內地人消費意欲低迷嘅核心問題，而上游價格大跌反映工業生產量下跌，稍後通縮風險傳導到至下游時，就會影響經濟。關博士預期，內地下半年會力谷基建開支，以達至全年經濟增長5%嘅目標。
港股方面，邊啲股份會有炒作空間？關博士認為，重磅科技股阿里巴巴(09988)、騰訊控股(00700)、美團(03690)只適合短炒，有「中特估」概念加持嘅紅籌，先係未來港股嘅投資焦點。佢又話，中國中鐵(00390)、中國石油股份(00857)、中國移動(00941)近日走勢十分靚仔，而息高、估值低嘅中信股份(00267)亦受資金追捧，股價由5月底9元水平彈上近10元。
