【Now財經台】滙豐控股(00005)股價噚日一度重上60元嘅逾4年高位，但今朝偏軟。資金流方面．淡倉最少連續5日錄得流入，合共約700萬元資金坐貨。
星展財資市場部上市產品策略師鍾宛婷表示，投資者多數博短線高位回套，因為滙控過往多次升到60元水平後隨即回落，依家較活躍嘅PUT輪行使價逾50元，約10%價外，以換取約11倍嘅高槓桿。
不過Kathrin話，外圍唔少消息或利好滙控為首嘅銀行股，一來澳洲同加拿大央行出乎意料重啟加息，市場亦預期美國聯儲局7月會加息，二來滙控一直有回購股份，有助支持股價。佢提醒淡友要嚴格執行止蝕，萬一股價升穿60元水平，正股上升空間就會大咗。
Kathrin續指，股份噚日突破60元後，開始有好友部署，多人留意9月到期嘅CALL，行使價約67元，槓桿有逾10倍。
