【Now財經台】旅遊出行股近期回勇，其中，同程旅行(00780)股價9連升，並挑戰4月嘅前高位，而攜程集團(09961)原本受制275元嘅橫行區間底，集團今朝出咗首季業績後，股價一度高見282.8元，衝上逾1個月高位。有報道指，端午假國內機票預訂較1周前大增近57%，早前攜程都透露，透過集團平台預訂端午節來港旅遊嘅定單飆5倍，端午節旅遊出行愈嚟愈旺，之後又到暑假等出行旺季，係咪有利攜程呢類股份更上層樓？
艾德金融董事陳政深指，如果睇返攜程業績表現算係唔錯，亦反映內地出現報復式出行，而高考後及暑假亦係集團生意「黃金期」。股價方面，Ryan就話，攜程業績的確仲有上升空間及偏向樂觀，但有兩樣嘢要考慮，首先係估值偏高，其次係股價走勢有隱憂，去到頸線位，即270元水平，另一個阻力喺280元水平，呢兩阻力唔易破，而喺高位有獲利盤湧現，所以現水平值博率唔係太大。
