【Now財經台】聯儲局下星期議息,市場對暫停加息嘅預期續升溫,美股3大指數繼續喺高位徘徊。值得留意係,反映中小型企業狀況嘅羅素2000指數再跑贏納指,3個交易日累升2.7%,依家連細價股都郁,係咪反映美股升勢更全面,有利呢浸升浪持續更長時間?
潤淼資產管理董事盧志威指,美國債務上限危機化解後,美股升得唔錯,中小型股都升埋上去。此外,美國加息周期已屆尾聲,對美國經濟嚟講係一個利好訊號,因為之前不停加息令實體經濟有壓力。
William估計,美股升到現水平應該差唔多見頂,因此,部分資金會買入羅素2000嘅細價股,而喺美息趨勢向下嘅情況下,美股未來有機會再升5%至10%,長揸係一個唔錯嘅選擇。