【Now財經台】智欣集團控股(02187)今朝開高近1%，報7.32元，但已經係全日低位，午後走勢同大市背馳，尾市更不斷衝高，最多升逾10%，觸及8元整數關口，最終以接近全日高位收市，報7.99元，創2021年3月上市以來新高，成交股數較過去100日同時段平均增兩倍。
智欣股價強勢，集團基石投資者來頭唔細，睇返兩年前上市文件，兩名基石投資者分別係美團(03690)創辦人父親，以及三一重工旗下公司，兩者持股相當於總股本約6%，不過，集團上市至今以業績一直交唔到貨，市盈率(PE)炒上逾3000倍，但完全無基本因素支持，投資者都唔適宜因為股價強勢跟風追入。
