【Now財經台】截至早上11時止，1小時內《彭博》用戶關注度上升最多港股，依次為龍湖集團(00960)、碧桂園(02007)、美團(03690)、合景泰富(01813)及中國平安(02318)。
碧桂園及合景泰富噚日收市後出咗5月合同銷售數據，前者按年跌近37%，後者跌42%，內房股噚日顯著回套，今日又急彈，走勢大上大落係咪借《新華社》引述財政部官員話，地方政府債務可控，當局有足夠財政資源避免風險擴散，呢個消息係咪有利提振內房及金融市場投資氣氛？
資深證券分析師彭偉新指，呢啲消息心理上係有幫助，但對力度存疑，最近收到唔少推介大灣區樓盤嘅跨境電話，反映發展商搵唔到買家，相信內地房地產市場仍處於下降周期，銷量及價格難有重新回升嘅基礎，因為內地最新公布嘅經濟數據中，零售銷售、工業生產增加值等都差過預期，即使內地居民消費價格指數(CPI)、工業生產者出廠價格指數(PPI)回升，但睇唔到持續上升勢頭，相信內房仍然偏弱，但中央亦希望樓市穩定，預期內房發展商喺經濟穩定後，會大量推售項目，因此，會縮短回調時間，佢又提醒，炒內房股要轉身夠快。
