【Now財經台】蘋果公司噚晚舉行年度全球開發者大會(WWDC)，會上發布咗頭戴式裝置Vision Pro，喺集團10年以來嘅重大產品，不過，喺本港上市嘅蘋果槪念股今朝受壓，其中，高偉電子(01415)開市前跌近3%，其後更一度暴瀉24%，高偉係Apple新產品混合現實技術設備(MR)主要光學供應商之一，點解Vision Pro帶挈唔到高偉股價？
高富金融集團投資總監梁偉民坦言，暫時唔好太樂觀，因為呢款產品短期內需求唔大，加上售價貴，除咗「果迷」希望搶閘感受新產品，一般消費者未必會太熱衷，估計銷情未必太理想。
Wyman又話，Apple其他產品銷售前景一般，呢個同經濟下行及疫情周期有關，因為疫情開始時要WFH或留喺屋企娛樂，令手機、電腦等銷售大升，而呢個周期會提早消費咗未來嘅需求，導致舊年至今年嘅需求受影響，因此，唔睇好同Apple設備相關嘅零件供應商。
