【Now財經台】停牌約1星期嘅安寧控股(00128)今朝復牌，一度升近14%，高見0.53元，股價今日大幅炒上原因係獲大股東華懋集團以每股0.58元，提出私有化，雖然較停牌前有25%溢價，但較每股綜合資產淨值約0.692元，就折讓逾16%，華懋出手係咪合理？
《香港股票財技密碼》作者梁杰文指，單睇價錢，對小股東來講唔算係超值，但比較資產淨值(NAV)，華懋提出私有化嘅邀約價低過NAV，雖然每股作價較前收市價有25%溢價，但其實同舊年下半年嘅股價差唔多，甚至較1年前股價低。Mike又話，安寧股價低迷主要係受疫情影響，以及公司經常錄得一次性金融虧損有關，不過， 隨著公司負面因素慢慢減退，即使冇私有化消息，集團已逐步重拾正軌、虧損亦收窄，相信股價仍有上望空間，因此，今次私有化出價只係一般 。
