【Now財經台】科指今日一度升逾2%，騰訊控股(00700)曾升4%，美團(03690)一度升6%，科技股之前跌到好殘，彈返高都好正路，京東「618購物節」開波，帶挈京東集團(09618)股價一度升逾5%，直播帶貨概念股東方甄選(01797)彈得仲多，但其他電商股持續弱勢兼彈唔起，其中一個原因係內地經濟反彈情況不似預期，「618購物節」幫唔幫到手？
艾德金融董事陳政深指，6月對京東嚟講的確好重要，即日起會有為期幾日嘅促銷活動，而投資者都可以見到內地電商氣氛係點，但市場依家普遍唔敢對「618購物節」，以及其他電商活動有太大期望，畢竟依家實體經濟嘅不明朗因素仍然較多，加上電商賣嘅商品好多係非必需品，由於市場觀望氣氛較濃，相信「618購物節」對京東股價嘅推動作用唔大。
