【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、美團(03690)、中國南方航空(01055)、碧桂園(02007)、比亞迪股份(01211)。
港股今日反彈，科指一度升逾2%，其中一個原因係受惠於「618購物節」，京東集團(09618)股價一度升逾5%，科技股喺「六絕月」反彈空間有幾大？美國債務上限協議已經過咗眾議院呢關，市場避險情緒係咪會降溫？
椽盛資本投資總監曾永堅指，大型新經濟股、科網股之前已累積一定跌幅，如果睇返成交金額，其實唔係面對好大沽壓，大型新經濟股及恒指回落純粹受美國債務上限消息影響，至於騰訊股價回落到250天線水平，唔排除因為有部分淡倉先行平倉離場，帶動股市反彈。
曾永堅又話，作為其中一個困擾大市氣氛嘅原因，美國債務上限協議今朝啱啱喺眾議院以較大比數通過，之後就去參議院闖關，相信亦有望通過，債限問題基本上已經解決，預期喺大市會出現補倉活動，恒指、一眾大型新經濟股、科網股有望出現技術性反彈。
