【Now財經台】截至早上11時止，1小時內《彭博》用戶關注度上升最多港股，依次為美團(03690)、騰訊控股(00700)、龍湖集團(00960)、碧桂園(02007)、友邦保險(01299)。
美團股價積弱，但標普500分析則睇好美團，估計未來24個月的EBTIDA及淨現金流有改善。另外，高盛引述美團管理層表示，集團計劃今個季度投入5億人仔，搶佔到店業務市場，但美團股價仍跌至逾14個月低位，即使業務改善仍遠水救唔到近火？
紅蟻資本投資總監李澤銘指，睇返美團第1季業績及第2季趨勢，如果睇收入、毛利率、新業務發展，第2季都較之前明顯改善，去年第4季仍蝕錢，但今年第1季已扭虧為盈，預期盈利趨勢會持續擴闊。雖然美團業績、經營趨勢都無可挑剔，但市場依家由恐慌情緒主導，所以市場會擔心內地外賣市場競爭激烈，亦唔知幾時完，因此，美團跌到邊個位先會反彈，仍然係未知數，但現價對中長線投資者嚟講有一定價值。
