【Now財經台】金蝶國際(00268)股價已連跌5日，係表現最差科指成分股，高盛估計，金蝶下年可能仍要「見紅」，要到2025年先有望扭虧，雖然高盛削金蝶目標價13%，但調高未來4年整體毛利率預測，估計2026年會重上70%以上水平。科指今日下晝由跌轉升，雲服務相關股又跌幅收窄，但金蝶股價都係冇起色，係咪受高盛睇淡業績前景拖累？還是雲服務行業本身存在隱憂？
英皇資本財富管理方案研究總監陳錦興指，大行下調業績預測一定令投資者更審慎，金蝶股價今年一直疲弱，跑輸大市，而喺內地經濟疲弱下，金蝶盈利能力大不如前，令集團對新科技嘅投放更謹慎，難免影響業務表現，而研發成本高就會進一步削弱盈利。
