【Now財經台】截至早上11時止，1小時內《彭博》用戶關注度上升最多港股，依次為美團(03690)、騰訊控股(00700)、碧桂園(02007)、比亞迪股份(01211)、龍湖集團(00960)。
美團、騰訊今日先高後低，前者連跌第4日，後者更跌足5日，同大市一樣冇起色，點解走勢會咁差？
獨立股評人譚智樂認為，美團及騰訊都有份拖低大市，大部分科技股今個月都出咗業績，共通點係收入比較疲弱，雖然有增長，但收入動力放緩，好多時見到盈利好過預期，其實只係靠削減成本，長遠係無以為繼。「五一黃金周」後，疫後復甦動力減弱，最弱係房地產市場，喺短暫「小陽春」過後，整體經濟動力轉差，業績好已經係之前嘅事，現階段股價繼續跌，係因為市場見唔到太多增長動力。
Arnold又話，雖然美團業績好過預期，但市場覺得競爭者愈來愈多，包括小紅書都開始行呢個路線，導致美團股價非常弱勢，如果投資者揸重貨，建議穿咗112元就要減持，亦唔建議溝貨。
