【Now財經台】港股仍未擺脫弱勢，之前炒高的「中特估」股份亦回調咗唔少，但股價調整後，「中特估」股息率普遍回升，究竟仲值唔值得吸納？
中原資產管理投資總監洪龍荃認為，息率方面，「中特估」仍有吸引力，電訊股有5厘至6厘，石油石化股更高達7厘至11厘，但佢提醒，買貨前更需關注公司基本面。
之前「中特估」升浪主力係中資電訊股、石油石化股、中資金融股呢3類高息股，其中，Larry最睇好電訊股，指行業已過咗5G高速投資期，步入收益穩健嘅收成期，加上各電訊公司注入新經濟元素，陸續開展人工智能(AI)同雲業務，相信未來盈利增長較有保障。
Larry又話，其次係睇好石油石化股，原因係股息率吸引，但考慮國際油價近排回落，或會影響往後業績表現。
Larry續稱，港股近排弱勢，建議投資者等電訊股嘅股息率升至7厘水平後，分3至4次慢慢吸納，每當股價跌5%至10%就買1注，咁就可以拉高平均股息率到8厘至9厘。
