【now.com財經】確實近期有唔少股民對住個港股幾乎識得嘅粗口都講晒出嚟咁滯，如果係揸住正股嘅話，咁都仲明白點解粗口橫飛；但如果係稍為識得玩反方Product嘅話(唔理你係輪證定option定反方ETF，乜嘢都好啦)，其實無論係升定跌，市場上都有Product比你揀，甚至乎可以用呢啲反向Product幫自己嘅正股做對沖，咁嘅情況之下，最多都係鬧佢廢啫，應該無影響你個倉位架喎...心靜自然涼架啦~
今朝揀咗隻恒指熊(64461)出嚟，Set好一係見10小時線再現阻力就出動；再唔係用返五分鐘圖嘅Slow STC(14,3)行Swing Trade咁玩。
以今朝Patreon出文時間為10點14分，如常的用10分鐘作為睇文時間，即10點24分再睇返恒指五分鐘圖，完全未見到 Slow STC(14,3)有力行到上超買嘅情況，去到10點30分，仲喺五分鐘圖見指數失守保歷加中軸向下往超賣方向出發咁。而同步亦見小時圖10線都未有突破嘅情況，基本上都符合咗以不過10小時線為由而出隻(64461)嘅。
按10點30分起計10分鐘作為買貨時間，即以10點30分至10點40分期間，(64461)高低位做過0.082元/0.076元，平均買入價為0.079元。
入貨後指數其實都開始食咗幾啖豬油咁，行得實在太慢，去到10點55分時見五分鐘圖Slow STC(14,3)兩線落到去個位數嘅嚴重超賣水平，但可惜當時保歷加通道口無拓闊，所以指數同Slow STC(14,3)出現觸底情況。20分鐘後，再見指數回抽上中軸附近出「爭一點平頂」，Slow STC(14,3)連50都去唔到又回，或者繼續用10小時線做量度線，同步留意住五分鐘圖指數有無乖乖地沿住「下降通道」向下運行啦。
下半場開市後見到指數仍然受制於中軸水平，不過到咗1點15分，指數忽然向上抽高過中軸，換上小時圖見10線仍然健在，就由佢繼續落去啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室七日免費試用：https://www.patreon.com/cbbcwar
