【Now財經台】中播數據(00471)今朝復牌。股價高開逾8%，早段升幅曾擴大逾10%至即市高位0.51元，但中午收市前升幅就收窄返到5%，半日報0.485元。
中播從事衛星媒體業務都有一段時間，但喺內地一直冇乜發圍，已經連續好幾年蝕錢。
呢隻毫子股上星期四(25日)下午停牌。尋晚出通告交待停牌原因，指公司最新與菲律賓科技公司SCT簽署服務採購協議，將會為當地偏遠村莊提供衛星寛頻，以及為政府提供衛星公共應急服務信息服務，預計最少覆蓋8000個村莊，協議為期2年。
公司預計呢次合作會帶來可觀收入，但冇交代預計具體金額。其實公司5月初亦出過通告，公布衛星移動數據服務在菲律賓落地，但股價當時冇乜反應。
股份技術上未出現轉勢，股價5月初開始失守250天線，今日成功收復，但暫時未可以企穩，而且近日10天線跌穿咗250天線，反而出現沽貨訊號。
