【Now財經台】美國債務違約問題有望緩解，市場重新聚焦聯儲局6月會唔會暫停加息。上周末出爐嘅美國4月個人消費開支物價指數(PCE)按年升4.4%，撇除食品及能源嘅核心PCE按年升4.7%，均高過預期。通脹未見大幅回落，6月聯儲局維持利率不變嘅機會大唔大？
工銀亞洲金融市場部高級經濟師程嘉偉預期，聯儲局6月會停止加息，因為睇返官員嘅言論，佢哋仍然憂慮加息可能加劇當地中小型銀行流動性危機，加上息口已處於高水平，加息步伐冇必要太激進。
不過，Gary認為，現時美國聯邦利率雖然接近峰值，但只係行到加息周期嘅中段。佢解釋，美國就業市場仍然熾熱，通脹按月約0.5%嘅升幅其實偏高，1年累計，隨時升4%至5%，聯儲局之後或視乎通脹情況再加息。
