【Now財經台】小鵬汽車(09868)噚晚出咗業績，首季蝕約23億人仔，同去年第4季差唔多，但按年虧損擴大，收入按季跌20%，按年更近乎「腰斬」，屬集團指引下限。值得留意係，汽車毛利率跌至負2.5%，近3年以嚟首次出現負數，幾乎賣1部蝕1部，小鵬呢份業績似乎搵唔到任何亮點。
艾德金融董事陳政深指，小鵬呢份業績不單冇亮點，甚至唔係處於1家企業應有嘅經營狀態，冇賺錢模式之餘，手頭現金亦持續減少，據小鵬內部估計嘅汽車交付量亦比較保守，來季每個月只得數千架，根本難以收支平衡，其中龐大嘅開支係小鵬必須解決嘅問題。
Ryan又話，小鵬負利潤率除咗高成本外，缺乏補貼亦係主因，一面倒減價令整個成本結構不堪一擊，情況並唔樂觀。
