【Now財經台】截至早上11時止，1小時內《彭博》用戶關注度上升最多港股，依次為小米集團(01810)，騰訊控股(00700) ，美團(03690)，龍湖集團(00960)及碧桂園(02007)。
小米噚晚出咗業績，雖然第1季收入要跌，但經調整純利扭轉4個季度嘅跌勢，整體表現好過預期，毛利率達19.5%，創歷史新高，小米似乎成本控制做得唔錯，呢份業績收唔收貨？第2季表現可唔可以持續？雖然小米股價今日逆市靠穩，但睇返整體市況，依家做部署係咪太早？
椽盛資本投資總監曾永堅指，小米首季盈利表現好過市場預期，令市場有驚喜，市場始終最關注智能手機銷售收益及前景，因為智能手機銷售喺全球嘅復甦都不似預期，所以銷售能否達到公司預期市場都好關注。佢又話，小米未來收益會唔會受行業氣氛及競爭影響，或會限制咗小米股價喺業績後表現，所以股價仍未能擺脫弱勢。
