【Now財經台】浙江滬杭甬(00576)股價今朝裂口低開逾3%，跌幅好快擴大至6.6%，低見5.99元，收市跌近6%，收報6.04元，成交股數較過去100日平均成交大增6倍。
內地疫後重啟後，人流物流運輸需求加大，帶挈滬杭甬首季多賺逾40%，加上息率高、估值低，一度吸引資金追捧，股價更跑贏大市。
滬杭甬股價今日喺成交顯著增加下大跌，一口氣失守50天及守咗半年嘅100天線，可能同公司噚晚出通告，指計劃供股有關。
集團擬按每10股供最多3.8股比例供股，但須獲股東大會通過，同埋獲中證監及相關部門批准，今次供股計劃集資最多65億人仔，主要用嚟擴建高速公路、補充流動資金及還債，投資者要留意供股計劃最終係咪獲得通過，仲有之後嘅安排。
