【Now財經台】陸控(06623)噚日出完業績後，股價今日繼續受壓，睇返集團股權分布，依家中國平安(02318)持股41%，第2大股東持股27.9%，街貨只有約30%，呢個係咪陸控交投持續低迷嘅原因？
博威環球資產管理金融首席分析師聶振邦認為，街貨少反而對股價起穩定作用，陸控股價持續弱勢，主要係跟住大市走，港股下跌令整體投資氣氛差，加上人仔不斷貶值，難免對集團估值有影響。
聶Sir又話，陸控本身喺美國上市，之後再嚟香港掛牌，由於部分投資者已經投資咗美股，所以未必會再買港股，因而影響成交，除非短期有重大利好消息，否則，好難吸引資金買陸控港股。
