【Now財經台】越秀地產(00123)股價今朝輕微低開後，冇耐就跌穿供股價，午後跌幅不擴大，一度低見8.9元，跌1.4%，成交股數較過去100日同時段平均成交增1.8倍。
越地上月底公布供股計劃，供股價9元，折讓逾28%，集資逾83億元，股價喺宣布供股當日下晝已裂口急挫，之後股價反覆向下，今日仲跌到4個月低位。
大股東冇出手托住股價，今日插穿供股價，可能令唔少小股東放棄供股，如果最終冇小股東參與供股，根據大股東承諾，持股量將由39%水平增至逾46%，公眾股東持股就會由逾40%，攤薄至30%水平，即大股東變相大手增持股份，到底係市況差嘅意外發展，還是早已寫定嘅「劇本」，答案只有大股東先知道。
