【now.com財經】今朝揀咗隻恒指熊(64164)出嚟，諗住下方牛證咁鬼多，又於小時圖同日線圖上面見到差少少都到啲支持位，睇下佢會唔會一步到位向下再落，所以先Set定以五分鐘圖10線如果擋路，進取嘅就出場，又或者拉高少少用五分鐘圖20線都得；安全嘅如常用返Slow STC(14,3)超買位出場做一趟Swing Trade咁就收工。
不過，指數今日向下挫咗落去之後，基本上都無乜點再瘋狂下行，所以今朝作戰室朝早追出淡倉之後，等唔到再落都見好就收算數。去到10點55分，五分鐘圖10線落到指數下方，形成指數上破五分鐘圖10線嘅情況(其實指數當時都真係橫行住)。再到11點15分，連五分鐘圖20線都嚟埋，同步見Slow STC(14,3)都差唔多由超賣水平上到去超買範圍，都係等Slow STC(14,3)見超買算數。
都唔駛等好耐，去到11點30分已經見到Slow STC(14,3)兩線上到80以上超買範圍，的確係符合咗(64164)出動而博Slow STC(14,3)轉向下嘅條件，不過整個圖形見到五分鐘圖10/20線都無啦啦變成指數嘅支持。保歷加通道雖然唔係好闊，但都有見開始整條上行嘅情況，呢啲咁嘅市之前都有見過，通常都係一心等入淡倉但就踩住兩線條+低斜度嘅上行保歷加而磨住上，睇嚟(64164)都係未適合落場。
「反過來出好倉又如何？」的確唔反對，依家12點49分，仲有11分鐘左右開下半場，若然指數仍然踩住五分鐘圖10/20分鐘線的話，好倉出動都望住五分鐘圖50線；小心到五分鐘50線前恒指跳草裙舞博你班友仔開淡倉但一支棍失心瘋咁飆咗上去，焗你跪低；你知呢期幾興要人跪低架啦。
咁嘅情況，你唔搞我，我唔惹你怕且都係最「和平」嘅做法，「咁即係避開佢啦？」嘿...如果唔係又點會咁多人走，離開香港，去咗外國，近近地甚至日本股市嘅懷抱呢？
望望個成交，半日450億都唔夠，陰功，或者Put爆港交所(00388)係最後一條出路。噚日喺一個YT節目裡面推咗隻港交熊(62350)，睇死佢會再回返落去300元邊皮甚至再創年內新低，今日上半場低位見過301.2元，創咗啦，而(62350)明明換股比率獨家100咁高敏感度都係要揀啲高街貨貼價熊，好啦，港交熊(63886)，收回價330元，同現價有約8.77%差距，市場上第三貼價熊證當中，最高槓桿、最低街貨。
留意港交所目前於日線圖上行咗「十字星」形態，「下降通道」唔駛拉線都見到，而目前股價處於「下降通道」中間；換個五分鐘圖則見Slow STC(14,3)頂到上天花板，等觸頂出動囉，Swing Trade唔一定只限於恒指嘅。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
作戰室七日免費試用：https://www.patreon.com/cbbcwar
