【now.com財經】今朝見到小時圖條50小時線(小時圖50線)硬過我條命，所以就揀咗恒指熊(63454)出嚟，以小時圖見指數仍低於50小時線出動。按今朝Patreon出文時間為10點11分，如常on top用10分鐘作為睇文的話，即喺10點22分再睇返小時圖，嗰條50小時線仲企硬緊，(63454)可以出動。
如常的用10分鐘作為(63454)買入時間，即以10點20分至10點30分，(63454)期內高低位做過0.064元/0.058元計，平均買入價為0.061元。
今朝早喺文中同時亦都好以50小時線為量度線，而下方見有10小時線(小時圖10線)同20小時線(小時圖20線)似作勢支持，如果指數無腦地向下落而穿過10/20小時線的話，(63454)亦可以無腦地持貨落去；相反，見指數落到去10/20小時線之後有啲爭扎出現，咁(63454)亦可以見好即收。
依家1點20分，指數跌幅一度跌逾140點，小時圖上見喺11點至12點嗰段時間已經過10/20小時線，到依家下半場開市後，指數更低走於中軸，重新返落去保歷加下降通道Slow STC(14,3)兩線仍保持向下運行，只係保歷加通道口未見拓闊啫；唔緊要，用小時圖咁樣向下Swing一趟都真係下個星期等期結，提早收工。
當然，唔想過夜嘅亦都可以轉返用五分鐘圖Set定量度線。見開始又橫風橫雨，閂返好隻窗免得又嚇親我家肥貓之後，指日數跌幅細咗，五分鐘圖上見有想挑戰50分鐘線(五分鐘圖10線)位置。其實以今日成個五分鐘圖嚟計，一大條「下降通道」唔駛拉線都清晰可見，中段出過嘅「圓頂」頸線水平下破時亦都係作戰室第二次入淡倉嘅時機，咁啱仲有條100分鐘線(五分鐘圖20線)喺度，呢個位絕對適宜做量度線位置，不過線會郁嘅，以目前整條保歷加通道向下落緊去嚟計，用返100分鐘線最合理。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
