【Now財經台】飛思達科技(01782)今日高開1%後越升越有，午後升幅擴大至逾10%，並以全日高位3.44元收市。成交額約700萬元，成交股數較過去100日平均成交增加約5倍。
飛思達科技喺內地做應用性管理解決方案(APM)業務，主要顧客係電信營運商及大型企業。公司喺3月底公布去年全年業績，由盈轉虧，除咗疫情因素，公司話係因為加大咗產品及服務部及研發部門人手，以提升5G相關業務嘅競爭力，又話已經建立人工智能團隊加強產品交貨能力。
公司上周初公布新業務發展，包括軟件開發服務及技術服務到中央銀行數字貨幣CBDC網絡系統的新業務市場，同埋計劃更改公司名稱配合新業務發展。消息公布前，已有春江鴨入市推升股價，到消息公布後，股價由上周一至今，已累升50%。
公司去年初獲現有大股東杜力，以約每股0.6811元購入公司股份及提出全購，最新持股升到75%以下，入主後有二供一集資活動，今日股價最高去到3.44元，供股價0.55元，睇返杜力手頭持股，帳面獲利幅度都好大。
雖然飛思達科技股價過去一個月累計升80%，但市值只不過26億，留意股價仲有幾大上升空間。
