【now.com財經】今朝揀咗隻恒指牛(58606)出嚟，計劃等五分鐘圖最近嘅平均線有力托得起指數上去先至出；或者安全嘅就等返Slow STC(14,3)兩線回落超賣水平，當平時嘅Swing Trade咁用。
今朝11點5分，指數稍稍回落嘅同時，50分鐘線(五分鐘圖10線)亦已經上到指數附近，但再過多五分鐘，恒指無懸念地向下穿過50分鐘線，換言之出(58606)嘅第一個計劃失敗，唯有等Slow STC(14,3)落返去超賣位，當今日行一趟Swing Trade。
截至到上半場完場前，莫講話兩條線，Slow STC(14,3)根本連一條線都未入到超賣範圍。
等到依家1點32分，恒指下半場開咗市半個鐘，都只係見到指數橫行，保歷加通道頂至底高度只得70點，都係等下先，反正作戰室午後開出淡倉都係要等。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
