【Now財經台】內地地產代理貝殼(02423)出咗首季業績，今年首季總交易額升近66%，淨收入升61%，期內股東應佔由虧轉盈，前年蝕6.18億人民幣，去年轉賺27.5億元人民幣，期內毛利率更大升13.6個百分點至31.3%，存量房及新房業務總交易額增幅都跑贏市場。數據全部都好好，但點解都要跌？
紅蟻資本投資總監李澤銘指，貝殼跌未必同業績有關，市場對今次業績嘅反應普遍都正面及樂觀。見市場基本上所有板塊，例如科技股出咗業績後，無論好定差，股價都係要跌。即使貝殼自己做得好，股份仍然屬於房地產市場，內房依家無論係國企或民企背景，股價都尋緊底，所以市場較憂慮內房前景。加上近期出現一啲市場認為無問題，但出現違約嘅房地產企業，都進一步打擊市場信心。
